Sementsverksmidjan

Helstu kostir

við notkun íslenska sementsins

Til umhugsunar fyrir byggjendur og eigendur húsa og annarra mannvirkja og stjórnendur almennt í byggingariðnaði á Íslandi, eru hér að neðan tíundaðir ýmsir kostir þess að nota íslenska sementið sem bindiefni í steinsteypu, múrblöndur o. fl., sem og nokkrar tengdar spurningar. Öll atriðin lúta að þjóðarhag, nýtingu innlendra auðlinda og gjaldeyrissparnaði.

Íslenska sementið:

· er framleitt úr íslenskum hráefnum, þ. e. skeljasandi, líparíti, basalti og kísilryki, sem aflað er með íslensku vinnuafli;

· er framleitt með íslensku vinnuafli í Sementsverksmiðjunni hf á Akranesi;

· er með sérstökum eiginleikum og gæðum umfram hreint sement af portlandgerð og helgast það aðallega af íblöndun kísilryks;

· er fyrsta flokks vara sem hentar til gerðar úrvalssteypu fyrir hin ólíkustu mannvirki;

· er sérstaklega þróað til notkunar við íslenskar aðstæður, m. a. í raforkuvirkjanir með afar góðum árangri;

· er með sérstökum varnarefnum gegn krómexemi, sem fáar erlendar sementstegundir hafa.

Hvers vegna:

· ætti að byggja hús og önnur mannvirki úr innfluttum byggingarefnum eins og timbri og stáli eða öðrurm málmum, þegar unnt er að gera þau úr alíslenskri steinsteypu?

· ætti að klæða hús að utan með innfluttum plötum, þegar til er íslensk múrklæðning sem er bæði ódýrari og endingarbetri?

· ætti að gera innveggi húsa úr innfluttum plötum eða einingum, þegar til er betri og traustari kostur sem er hlaðinn og múrhúðaður steinveggur?

· ætti að nota malbik í slitlag á fjölfarnar götur og vegi, þar eð slíkt skapar mengun og þarf títt að endurnýja, þegar unnt er að nota hástyrkleikasteypu með margfalt lengri endingu?